រដ្ឋមន្ត្រីការបរទេសសហរដ្ឋអាមេរិកលោក Antony Blinken ធ្វើដំណើរទៅកាន់ប្រទេសហ្សកដានីនិងតួកគីនៅថ្ងៃពុធនេះនៅក្នុងកិច្ចប្រឹងប្រែងដើម្បីរួបរួមប្រទេសនានានៅក្នុងតំបន់ដើម្បីទទួលបានចក្ខុវិស័យស្របគ្នាមួយសម្រាប់ប្រទេសស៊ីរីនាថ្ងៃអនាគត បន្ទាប់ពីទម្លាក់មេដឹកនាំផ្តាច់ការយូរអង្វែងលោក Bashar al-Assad។
លោក Blinken នឹងធ្វើដំណើរទៅកាន់ទីក្រុង Aqaba ប្រទេសហ៊្សកដានីនិងទីក្រុង អង់ការ៉ានៃប្រទេសតួកគីដើម្បីពិភាក្សាអំពីព្រឹត្តការណ៍នៅក្នុងប្រទេសស៊ីរី អ៊ីស្រាអែល តំបន់ហ្កាហ្សា ប្រទេសលីបង់និងទូទាំងតំបន់។ នេះបើតាមក្រសួងការបរទេសសហរដ្ឋអាមេរិក។
អ្នកនាំពាក្យក្រសួងការបរទេសបាននិយាយថាលោក Blinken មានគោលបំណងការពារការមូលមតិគ្នាក្នុងចំណោមមេដឹកនាំក្នុងតំបន់លើគោលការណ៍សំខាន់ៗសម្រាប់អន្តរកាលក្រោយរបប Assad នៅក្នុងប្រទេសស៊ីរី។ លោកបាននិយាយថាបញ្ហាទាំងនោះរួមមានការគោរពឱ្យបានពេញលេញនូវសិទ្ធិជនជាតិភាគតិច ការសម្របសម្រួលជំនួយមនុស្សធម៌ ការរារាំងកុំឱ្យស៊ីរីក្លាយជាកន្លែងជ្រកពួនរបស់ភេរវជនឬគំរាមកំហែងដល់បណ្តាប្រទេសជិតខាងរបស់ខ្លួន ហើយការពារនិងកម្ទេចឃ្លាំងផ្ទុកអាវុធគីមីឬជីវសាស្ត្រ។
លោក Blinken បានមានប្រសាសន៍ថាសហរដ្ឋអាមេរិក នឹងទទួលស្គាល់រដ្ឋាភិបាលស៊ីរីដែលគោរពគោលការណ៍ទាំងនេះ។
អ្នកនាំពាក្យបាននិយាយទៀតថានៅក្នុងទីក្រុង Aqaba លោក Blinken នឹងជួបជាមួយពួកមន្ត្រីជាន់ខ្ពស់ហ្សកដានីដើម្បីពិភាក្សាបញ្ហាទ្វេភាគី សង្កត់ធ្ងន់ទៅលើភាពជាដៃគូយុទ្ធសាស្ត្ររវាងសហរដ្ឋអាមេរិកនិងហ៊្សកដានី ហើយបញ្ជាក់ឡើងវិញនូវការគាំទ្ររបស់សហរដ្ឋអាមេរិកទៅលើស្ថិរភាពនៅក្នុងតំបន់។
នៅក្នុងទីក្រុងអង់ការ៉ា លោក Blinken នឹងពិភាក្សាជាមួយពួកមន្ត្រីជាន់ខ្ពស់តួកគីដើម្បីពង្រឹងកិច្ចសហប្រតិបត្តិការទ្វេភាគីលើអាទិភាពរួមគ្នា រួមមានការប្រឆាំងភេរវកម្មនិងស្ថិរភាពក្នុងតំបន់ជាមួយសម្ព័ន្ធមិត្តតួកគីដែលជាសមាជិកអង្គការអូតង់៕
