លោកម៉ម សុណង់ដូ នាយកវិទ្យុសំបុកឃ្មុំ បានប្រកាសនៅថ្ងៃច័ន្ទនេះថា លោកនឹងបើកប្រាក់ខែឲ្យក្រុមបុគ្គលិកដែលត្រូវបណ្តេញចេញពីការងារ ស្របពេលដែលក្រុមបុគ្គលិកវិទ្យុសំបុកឃ្មុំ បន្តធ្វើបាតុកម្មនៅពីមុខស្ថានីយ៍ផ្សាយរបស់ខ្លួនដើម្បីទាមទារប្រាក់ខែ និងការគោរពលក្ខខណ្ឌការងារ។
បន្ទាប់ពីបានចូលទៅបំភ្លឺនៅមន្ទីរការងារ និងបណ្តុះបណ្តាលវិជ្ជាជីវៈក្រុងភ្នំពេញនៅព្រឹកថ្ងៃច័ន្ទនេះ លោកម៉ម សុណង់ដូបានប្រាប់VOA ខេមរភាសាថា លោកបានយល់ព្រមផ្តល់ប្រាក់បៀរវត្សរ៍ខែកុម្ភៈជូនដល់បុគ្គលិក៤រូប ក៏ប៉ុន្តែលោកនៅមិនទាន់បញ្ជាក់ច្បាស់នៅឡើយថា លោកនឹងទទួលយកបុគ្គលិកទាំងនេះឲ្យចូលធ្វើការវិញ ឬយ៉ាងណានោះទេ។
«បញ្ហាដែលខ្ញុំទទួលអ្នកទាំងអស់នោះឲ្យធ្វើការឡើងវិញគឺគ្មានសង្ឃឹមទេ ព្រោះខ្ញុំឃើញសកម្មភាពរបស់បុគ្គលិកទាំងអស់នឹងមិនមែនចង់ដោះស្រាយបញ្ហារបស់គាត់ទេគឺគាត់ធ្វើសកម្មភាពធ្ងន់ធ្ងរប្រឆាំងនឹងខ្ញុំនិងវិទ្យុរបស់ខ្ញុំ»។
ក្រុមបាតុករបានអះអាងថា មានបុគ្គលិកវិទ្យុសំបុកឃ្មុំ FM 105 មេហ្គាហឺតចំនួនបួននាក់មិនទទួលបានប្រាក់ខែសម្រាប់ខែកុម្ភៈកន្លងទៅនេះទេ។ ហើយពីរនាក់ក្នុងចំណោមបុគ្គលិកទាំងបួនត្រូវលោកម៉ម សុណង់ដូ បណ្តេញចេញពីការងារ។ បញ្ហានេះដែលធ្វើឲ្យបុគ្គលិក១១នាក់ក្នុងចំណោមបុគ្គលិកសរុបចំនួន២៤នាក់នៃវិទ្យុសំបុកឃ្មុំបានធ្វើបាតុកម្មតវ៉ាចាប់តាំងពីសប្តាហ៍មុនមកដើម្បីទាមទារការឈប់សម្រាកប្រចាំឆ្នាំឲ្យបានយ៉ាងហោចណាស់១សប្តាហ៍ ការដំឡើងប្រាក់ឈ្នួល និងប្រាក់អតីភាពការងារជាដើម។ ហើយការតវ៉ានេះបានកើតឡើងក្រោយពីជម្លោះរវាងបុគ្គលិក និងនាយកវិទ្យុសំបុកឃ្មុំបានអូសបន្លាយចាប់តាំងពីពាក់កណ្តាលឆ្នាំ២០១៤មកម្ល៉េះ។ វិទ្យុសំបុកឃ្មុំជាវិទ្យុមានប្រជាប្រិយភាពមួយ។
អ្នកស្រី យាន សុវារី ជាអ្នកយកព័តិមាន និងជាបុគ្គលិកដែលបម្រើការឲ្យវិទ្យុសំបុកឃ្មុំដប់ឆ្នាំមកហើយ។ ក្នុងនាមជាបាតុករមួយរូប អ្នកស្រីបញ្ជាក់ថា ក្រុមបុគ្គលិកទាំង១១នាក់ដែលកំពុងធ្វើបាតុកម្មអាចប្រឈមនឹងការបញ្ឈប់ការងារ ត្បិតក្រុមអ្នកតវ៉ាមិនបានបំពេញការងារជិតពីរសប្តាហ៍មកហើយ។ ក៏ប៉ុន្តែប្រសិនបើមានការបញ្ឈប់នោះមែន ក្រុមអ្នកតវ៉ាគ្រោងនឹងទាមទារប្រាក់បំណាច់ចំនួន៣ម៉ឺនដុល្លារអាមេរិក។
«ប្រាក់ខែគាត់ត្រូវតែបើក ហើយអ្វីដែលយើងទាមទារគាត់ព្រម ឬមិនព្រមសឹមយើងទាមទារបន្តរទៅទៀត។ បើសិនគាត់គ្រាន់តែបើកប្រាក់ខែតែពួកខ្ញុំ៤នាក់ អាហ្នឹងក៏មិនត្រូវដែរ»។
គេដឹងថា វិទ្យុសំបុកឃ្មុំគឺជាវិទ្យុមានប្រជាប្រិយភាពមួយដែលធ្លាប់ទទួលរងការគាបសង្កត់ និងជាវិទ្យុដែលបើកឱកាសឲ្យមានមតិចម្រុះ និងមតិរិះគន់រដ្ឋាភិបាលផងដែរ។ ពេលថ្មីៗនេះ លោកម៉ម សុណង់ដូបានដាក់សំណើជាថ្មីទៀត សុំបង្កើតស្ថានីយ៍ទូរទស្សន៍។ តែសំណើរបស់លោកត្រូវបានច្រានចោលដោយក្រសួងព័ត៌មាន ដោយលើកហេតុផលថា មិនមានហ្វ្រេកង់ទំនេរ។
គូភាគីជម្លោះទាំងពីរនេះគ្រោងនឹងជួបចរចាគ្នាទល់មុខនាព្រឹកថ្ងៃអង្គារស្អែកនេះ នៅមន្ទីរការងារក្រុងភ្នំពេញដើម្បីបញ្ចប់ជម្លោះ៕