រដ្ឋមន្ត្រីការបរទេសកម្ពុជាលោក ប្រាក់ សុខុន នឹងត្រូវបានអញ្ជើញឲ្យចូលរួមក្នុងកិច្ចប្រជុំពិសេសមួយជាមួយរដ្ឋមន្ត្រីការបរទេសអាមេរិក លោក Rex Tillerson ក្នុងរដ្ឋធានីវ៉ាស៊ីនតោន ដូចរដ្ឋមន្ត្រីការបរទេសអាស៊ានផ្សេងទៀតដែរ។ នេះបើតាមលិខិតនិងការអះអាងរបស់មន្ត្រីក្នុងតំបន់។
កិច្ចប្រជុំថ្នាក់រដ្ឋមន្ត្រីអាស៊ានទាំង១០ប្រទេសនេះ នឹងធ្វើឡើងនៅថ្ងៃទី៤ ខែឧសភាខាងមុខ មួយថ្ងៃបន្ទាប់ពីកិច្ចប្រជុំរបស់ក្រុមការងារអាស៊ានថ្នាក់មន្ត្រីជាន់ខ្ពស់ ដែលគេគ្រោងនឹងធ្វើ នៅថ្ងៃទី៣ខែឧសភា។ នេះបើតាមការជូនដំណឹងរបស់អាស៊ានកាលពីសប្តាហ៍មុន ដែលវីអូអេទទួលបាន។
កិច្ចប្រជុំនេះត្រូវគេអធិប្បាយថា ទំនងជាអាចនឹងពិភាក្សាអំពីជំហរអាមេរិកចំពោះសមាគមអាស៊ានលើបញ្ហាសមុទ្រចិនខាងត្បូង បញ្ហាពាណិជ្ជកម្ម បញ្ហាជួញដូរមនុស្ស និងឧក្រិដ្ឋកម្មផ្សេងៗ។
ការរៀបចំកិច្ចប្រជុំថ្នាក់រដ្ឋមន្ត្រីការបរទេសនេះ កើតឡើងតែប៉ុន្មានថ្ងៃ ក្រោយពេលដែលមន្ត្រីអាមេរិក បានបញ្ជាក់ថា លោកប្រធានាធិបតីសហរដ្ឋអាមេរិក ដូណាល់ ត្រាំ នឹងចូលរួមក្នុងកិច្ចប្រជុំកំពូលអាស៊ានក្នុងប្រទេសហ្វីលីពីននៅខែវិច្ឆិកាខាងមុខ។
មន្ត្រីរដ្ឋាភិបាលអាមេរិក នៅតែបញ្ជាក់ជំហររបស់ខ្លួនថា អាស៊ានគឺជាដៃគូយុទ្ធសាស្ត្ររបស់សហរដ្ឋអាមេរិក ហើយអះអាងថា អាមេរិក នឹងបន្តធ្វើការពង្រឹងកិច្ចសហប្រតិបត្តិការជាមួយអាស៊ានតទៅទៀត៕
