ពលរដ្ឋអាមេរិកាំង៣នាក់ ដែលទើបដោះលែងចេញពីការឃុំឃាំងរបស់រុស្ស៊ី បានជួបជុំគ្រួសារឡើងវិញវិញកាលពីយប់ថ្ងៃព្រហស្បតិ៍នៅមូលដ្ឋានយោធា Joint Base Andrews ជាយក្រុងវ៉ាស៊ីនតោន។
អតីតទាហានម៉ារីនលោក Paul Whelan និងអ្នកកាសែតអាមេរិកាំងគឺអ្នកស្រី Alsu Kurmashevaនិងលោក Evan Gershkovichត្រូវបានស្វាគមន៍ដោយសំឡេងហ៊ោ កញ្រ្ចៀវពេលអ្នកទាំង៣បានចេញពីយន្តហោះដែលដឹកពួកគេមកដល់ដីអាមេរិកវិញ។ ប្រធានាធិបតីអាមេរិកលោក Joe Biden និងអនុប្រធានាធិបតីអ្នកស្រី Kamala Harris បានអោបស្វាគមន៍ពលរដ្ឋអាមេរិកាំងដែលត្រូវបានដោះលែងវិញទាំងនេះ។
លោកប្រធានាធិបតី Biden បានប្រាប់ក្រុមអ្នកយកព័ត៌មានដែលប្រមូលផ្តុំគ្នានៅមូល ដ្ឋានទ័ពអាកាសនោះថា«វាអស្ចារ្យណាស់ យើងចាំពួកគេមកវិញយូរមកហើយ។សម្ព័ន្ធមិត្តធ្វើឲ្យមានការផ្លាស់ប្តូរ។ ពួកគេជួយយើង»។
កិច្ចព្រមព្រៀងដោះដូរអ្នកទោសជាប្រវត្តិសាស្ត្រនេះ ធ្វើឲ្យអាមេរិកនិងសម្ព័ន្ធមិត្តអាចសម្រេចបានការដោះលែងអ្នកទោសនយោបាយ១៦នាក់កាលពីថ្ងៃព្រហស្បតិ៍ រួមទាំងពលរដ្ឋអាមេរិកាំង៣នាក់និងអ្នករស់នៅអចិន្ត្រៃយ៍នៅអាមេរិកនិងជាអ្នកសរសេរខ្ទង់ទស្សនៈឲ្យកាសែតដែលទទួលបានរង្វាន់ Pulitzer គឺលោក Vladimir Kara-Murza ដែលត្រូវវិលត្រឡប់ដាច់ដោយឡែកមកកាន់សហរដ្ឋអាមេរិកវិញផង។
កិច្ចព្រមព្រៀងនេះ ក៏ឈានដល់ការដោះលែងពលរដ្ឋអាល្លឺម៉ង់និងអ្នកទោសនយោ បាយរុស្ស៊ីផងដែររួមមានឈ្មោះ Dieter Voronin, Kevin Lick, Rico Krieger, Patrick Schoebel, Herman Moyzhes, Ilya Yashin, Liliya Chanysheva, Kseniya Fadeyeva, Vadim Ostanin, Andrey Pivovarov, Oleg Orlov និង Sasha Skochilenkoជាថ្នូរ រុស្ស៊ីទទួលបានបុគ្គល៨នាក់វិញ ។
នេះជាការដោះដូរអ្នកទោសដ៏ធំបំផុតរវាងសហរដ្ឋអាមេរិកនិងរុស្ស៊ីតាំងពីសង្គ្រាមត្រជាក់មក៕
ពលរដ្ឋអាមេរិកាំងដែលត្រូវបានដោះលែងក្នុងការដោះដូរអ្នកទោសជាប្រវត្តិសាស្ត្រមកដល់អាមេរិកហើយ
វេទិកាបញ្ចេញមតិ