ទ្វីបអាហ្វ្រិកនៅពេលនេះមានចំនួនអ្នកកើតជំងឺកូវីដ១៩ចំនួនជាងកន្លះលាននាក់ហើយ។ នេះបើតាមការប្រកាសកាលពីថ្ងៃពុធរបស់មជ្ឈមណ្ឌលទប់ស្កាត់ជំងឺឆ្លង CDC របស់ទ្វីបអាហ្វ្រិកដែលបានរាយការណ៍តួលេខអ្នកឆ្លងចំនួន៥០៨.០០០នាក់ ដោយប្រទេសអាហ្វ្រិកខាងត្បូងបានក្លាយជាកន្លែងផ្ទុះរាតត្បាតធ្ងន់ធ្ងរថ្មីមួយហើយបានរាយការណ៍ករណីឆ្លងថ្មីក្នុងមួយថ្ងៃចំនួនដល់ជាង១០.០០០នាក់។
មន្ត្រីអង្គការសុខភាពពិភពលោកនិយាយថា គេមិនអាចដឹងចំនួនអ្នកឆ្លងពិតប្រាកដនោះទេក្នុងចំណោមប្រជាជនសរុបចំនួន១.៣០០លាននាក់ ក្នុងប្រទេសចំនួន៥៤ នៃទ្វីបអាហ្វ្រិក ដោយប្រទេសទាំងនេះខ្វះខាតនូវសមត្ថភាពនៃការធ្វើតេស្តរកមេរោគ ហើយប្រព័ន្ធសុខាភិបាលនៅអាហ្វ្រិកក៏មានភាពទន់ខ្សោយ។
នៅជុំវិញពិភពលោក គិតត្រឹមថ្ងៃពុធ វីរុសកូរ៉ូណាបានឆ្លងដល់មនុស្សជាង១១,៨លាននាក់ ហើយជំងឺកូវីដ១៩បាបសម្លាប់មនុស្សចំនួន ៥៤៤.០០០នាក់៕
