ავსტრალიაში ძლიერი ქარისა და უამინდობის გამო, საშობაო არდადეგებზე 10 ადამიანი დაიღუპა. მთავრობის განცხადების მიხედვით, შტორმის შედეგად, ქვეყნის აღმოსავლეთ ნაწილში ათობით ათასი შენობა 27 დეკემბერს კვლავ ელექტროენერგიის გარეშე რჩება.
განსაკუთრებით დაზარალდა ვიქტორიის, ახალი სამხრეთ უელსისა და კვინსლენდის შტატები. 25 და 26 დეკემბერს იქ ძლიერი სეტყვა მოვიდა და კოკისპირული წვიმები იყო.
ქარიშხალმა შენობებს სახურავები ახადა, ხეები ფესვებიანად მოგლიჯა და დააზიანა გაყვანილობები. ავსტრალიის 90 000-ზე მეტი ოჯახი ახლაც ელექტროენერგიის გარეშეა.
მთავრობამ 27 დეკემბერს მოსახლეობა გააფრთხილა, რომ მოსალოდნელია მდინარეების სწრაფი ადიდება. ამის გამო, არ არის გამორიცხული იმ ბანაკების დატბორვაც, რომლებიც შობა-ახალი წლის კვირაში დასასვენებლად, ავსტრალიელთა ერთ-ერთი საყვარელი ადგილია და ხალხმრავლობით გამოირჩევა.
Facebook Forum