Kungiyar kwallon kafa ta Super Eagles ta tarayyan Najeriya, ta samu nasarar kasan cewa a matsayi na uku a gasar cin kofin nahiyar kasashen Afirka, a shekarar 2019 wanda ake bugawa a kasar Masar.

Super Eagles ta samu nasararne sakamakon doke takwararta kasar Tunisiya, daci daya mai ban haushi a wasan da suka buga ranar Laraba 17 ga watan Yulin 2019.

Dan wasan gaba na Najeriya Odion Ighalo, shi ya jefa kwallon a cikin mintuna na 3 da fara wasan, wanda hakan ya bashi damar kasan cewar dan wasan da yake kan gaba wajan jefa kwallaye a gasar inda yake da kwallaye biyar.

Wannane karo na takwas da Najeriya take samun daukar matsayi na uku cikin tarihin gasar cin kofin Afirka, kuma ta dauki kofin sau uku.

A ranar Jumma'a 19 ga watan Yulin 2019, za'a buga wasan karshe na gasar ta Afirka tsakanin kasar Senegal da Algeriya.