Dan wasan na kungiyar kwallon kafa ta Liverpool Sadio Mane, ya yanke shawarar komawa Real Madrid a karshen kakar wasa ta bana.

Tun bayan da kungiyar kwallon kafa ta Real Madrid ta dawo da Zidane a matsayin kocinta, ya bayyana cewar Sadio Mane na daya daga cikin ‘yan wasan da yake bukatar sayowa a kokarinsa na farfado da martabar kungiyar wacce tayi asarar kofuna uku a jere cikin kakar wasa ta bana.

Dan wasan Mane yana cikin jerin manya 'yan wasan gaba mafi muhimmanci a Liverpool, musamman a kakar wasa ta bana, inda ya ci wa kungiyar kwallaye har guda 11, a wasanni 11 na baya bayan nan da ya buga mata.

Real Madrid dai tana bukatar sayen manyan 'yan wasan gaba wadda zasu maye mata gurbin Christiano Ronaldo, bayan ya koma Juventus.

Real dai tana mataki na uku a kan teburin La Liga da maki 54, Atletico Madrid ce ta biyu da maki 56, inda Barcelona ce ta daya da maki 66, a ranar lahadi Real Madrid zata karbi bakuncin kungiyar Huesca cikin wasan mako na 26, bangaren Laliga.