Najeriya Ta Bukaci Hukumar INTERPOL Ta Sanya Idanu Akan Wasu ‘Yan Kasar Akan Badakalar Fiye Da Dala Miliyan 6

Majiyoyi sun bayyana cewar ana neman wadanda ake zargin-wani jami’in babban bankin Najeriya, Odoh Ocheme da wasu mutane biyu ruwa a jallo ne akan zargin kwaikwayar sa hannun tsohon Shugaban Najeriya Muhammad Buhari domin satar fiye da dala milyan 6 da dubu 200 daga babban bankin.

Ana zargin Ocheme da kitsa almundahanar tare da yin takardun bogi da sunan Shugaba Buhari domin wawure fiye da dalar amurka milyan 6 da dubu 200 daga asusun babban bankin Najeriya, tare da Adamu Abubakar da Imam Abubakar.

Hakan na kunshe a cikin wata sanarwa mai dauke da sa hannun Mukaddashin Kwamishinan ‘Yan Sanda kuma Shugaban Sashen Kula da Ayyuka da bincike na musamman a rundunar ‘yan sandan Najeriya, Oloho Okpoziakpo.