Mako guda bayan da masoyansa suka yi masa ihun yankan kauna, Lionel Messi ya zura kwallo daya ya kuma taimaka an zura wata a karshen makon nan a karawar da suka yi da Nice.
PSG ta doke Nice da ci 2-0 tana kuma saman teburin gasar ta Ligue 1 da tazarar maki shida.
A minti na 26 Messi ya zura kwallon bayan da Nuno Mendes ya doka masa ita.
Nice ta yi ta samun dama iri-iri amma hakarta ba ta cimma ruwa ba.
Fushin magoya bayan Messi shi ne rahotanni da ke nuna cewa yana shirin barin PSG a karshen wannan kakar wasa, batun da har yanzu babu tabbaci.
A minti na 76 ne kuma Messi ya kwaso wata kwana daga hagu inda Sergio Ramos ya zura kwallo a ragar Nice.
Gabanin haduwarta da PSG, kungiyar ta Nice ta lashe wasanni 14 a jere ba tare da an doke ta ba a wannan kakar wasa.
