Kungiyar kwallon kafa ta Chelsea ta tabbatar da samun raunin dan wasan baya nata Antonio Rudiger.

Chelsea ta bayyana cewar dan wasan ya samu rauni a gwiwar kafarsa ta hagu, a wasan da suka fafata da Manchester United na Firimiyar bana inda suka tashi 1-1 ranar Lahadi da ta gabata.

Antonio mai shekaru 26 da haihuwa dan kasar Jamus ya fice daga wasan yana dingishi, sai dai kungiyar ta bayyana cewar an samu nasarar yimasa aiki a kafar, amman ba zai buga sauran wasannin da ya rage mata a kakar wasan na bana ba.

Wasanni biyu ya rage wa Chelsea cikin gasar Firimiya, inda zasu buga da Watford da Leicester, kuma tana mataki na hudu a saman teburin.

Har ila yau takai matakin wasan daf da karshe na cin kofin Turai Europe, kana zasu gwabza da Eintracht Frankfurt na kasar Jamus a ranar Alhamis mai zuwa.