Washington D.C. —
Japan ta doke Ghana da ci 4-1 a wasan sada zumunta da suka buga a birnin Kobe da ke kasar ta Japan.
Kamar Ghana, ita ma Japan ta samu tikitin zuwa gasar cin kofin duniya da za a yi a Qatar.
Japan ta samu kwallayenta daga dan wasa Miki Yamane, Kaoru Mitoma, Takefusa Kubo da Daizen Maeda kamar yadda AP ya ruwaito.
Dan wasan Ghana Jordan Ayewa ne ya zura kwallo daya tilo da Ghana ta samu.
A ranar Talata Japan za ta kara da Tunisia yayin da Ghana za ta fafata da Chile a wasu wasannin sada zumunta da aka shirya za a yi.
A ranar 21 ga watan Nuwamba za a fara gasar ta cin kofin duniya a Qatar.
