Hankali Ya Tashi A Yankin Sahel Yayin Da Makwabta Ke Gargadi Kan Tsoma Bakin Juyin Mulkin Nijar

A farkon makon nan ne kungiyar tattalin arzikin yankin ta sanya wa'adin maido da mulkin hambararren shugaban kasar Mohamed Bazoum, ko kuma ta fuskanci yiwuwar shiga tsakani na soji.

Gargadin ya haifar da kakkausar suka daga wasu makwabtan Nijar guda biyu wadanda kuma suke da shugabannin da suka hau karagar mulki ta hanyar juyin mulki.

Yayin da ya rage kwanaki hudu wa’adin mayar da mulki ga zababben shugaban Jamhuriyar Nijar Mohamed Bazoum ya cika, da kuma makwabciyar Nijar Mali da Burkina Faso suke gargadi kan duk wani shiga tsakani na soji, tashin hankalin ya kara ta’azzara a yankin Sahel a wannan makon.

Nassirou Seydou shi ne shugaban kungiyar rajin kare hakkin dan Adam ta “Voice of the Voiceless.” Da yake magana da Muryar Amurka daga Yamai babban birnin Nijar, ya ce baya tsammani Kungiyar ECOWAS za ta shiga tsakani ta hanyar soji domin ba ta yi a Burkina Faso ko Mali a lokacin juyin mulkin da aka yi a baya-bayan nan ba.

Ya ce kamata ya yi tattaunawa ta zama babban mataki a irin wadannan yanayi.

Sai dai idan aka yi la’akari da takun-saka da abokan huldar Nijar na yanzu kamar Faransa da Amurka, Seydou ya ce, sabbin shugabannin sojan na iya komawa ga wasu kasashe don neman taimako a yankin.

A yayin da ake ta takun saka tsakanin Nijar da Faransa, tsakanin sojoji da fadar shugaban kasar Faransa, lamarin bai dace da a ci gaba da dangantaka ba, “musamman ma idan ana maganar Faransa da kawayenta na taimakawa Nijar wajen fita daga cikin halin da ake ciki. Don haka ya sa sojan Nijar ba shi da wani zabi illa duba wani waje.”

Sakataren harkokin wajen Amurka Antony Blinken ya ce ya yi magana da shugaban Nijar Bazoum da yammacin jiya Talata, ya kuma jaddada goyon bayan Amurka da kawayenta na gudanar da mulkin dimokradiyya.

“Gaskiya lamarin shine cewa Tchiani, jagoran juyin mulkin, yana jefa duk wannan cikin hadari. Ya sanya duk taimakon Amurka cikin haɗari. Ya riga ya rasa tallafin kasafin kudin Faransa. Faransawa sun yanke tallafin da suke bayarwa, Amurka na iya yanke taimakon da take bayarwa, watakila Amurka za ta katse taimakon tsaro."

Yayin da wasu ke cewa martanin da kasashen duniya suka mayar kan juyin mulkin ya dace sosai, Shurkin ya ce katse tallafin na iya haifar da wasu sakamakon.