Barcelona na dab da rasa kambinta na gasar La Liga, to amma babbar matsalar da za ta fi haka muni shi ne rasa gwarzon dan wasanta Lionel Messi.
Kwantaragin Messi zai karkare a kungiyar ne a shekara mai zuwa, a yayin da kuma rahotanni su ka ce ya daina maganar sabuntawa da kowa, sakamakon takaicin yadda alkiblar kungiyar ke tafiya.
Wani gidan rediyon kasar Spain mai suna Cadena Ser, ya ruwaito cewa “Messi na shirin barin kungiyar ta Barcelona,” inda ta ce “yanzu haka dan wasan na jiran karewar wa’adin kwantaraginsa ne kawai.”
A watan Fabrarirun da ya gabata Messi ya bayyana cewa ba ya tunanin Barcelona za ta iya lashe gasar zakarun Turai da irin yanayin da take ciki.
Haka kuma dan wasan mai shekaru 33, ya yi ta samun takun saka da rashin jituwa da shugabannin kungiyar, a karkashin jagorancin Joseph Maria Bartomeu.
Facebook Forum