Fitaccen mawakin Najeriya Mr. Olubankole Wellington da aka fi sani da Banky W, ya lashe zaben fidda gwani da aka yi na takarar kujerar dan majalisar wakilai karkashin jam’iyyar PDP a zaben 2023.
Banky ya samu nasara ne bayan da ya samu kuri’u 28 cikin 31 da wakilai suka kada don fitar da wanda jam’iyyar ta PDP za ta tsayar takarar kujerar mazabar Eti-Osa a Majalisar wakilai da ke jihar Legas da ke kudancin Najeriya.
Bayan da aka kammala kidaya kuri’un tare da bayyana sakamakon, masoyan Banky sun dauke shi a kafada suna murnar lashe zaben kamar yadda wani bidiyo da mawakain ya wallafa a Instagram ya nuna.
A shekarar 2019, Banky ya fadi zaben mazabar ta Eti-Osa inda dan takarar APC Babajide Obanikoro ya kada shi.
A badi ne za a gudanar da zaben gama gari a Najeriyar ciki har da na ‘yan majalisar wakilai.
