A yayin da aka soma fafata sabuwar kakar wasanni ta gasar kwallon kafa ta Premier ta Ingila, Arsenal ta soma da lallasa sabuwar shiga, kungiyar Fulham da ci 3-0, a wasan da sabbin sayen ‘yan wasanta suka soma haskawa.
Tsohon dan wasan Chelsea Willian ya ba da gudummuwa a dukkan kwallayen 3 da kungiyar ta zura, a yayin da Gabriel da kungiyar ta saya daga Lille akan kudi fam miliyan 23, ya zura kwallonsa ta farko a Ingila.
Arsenal ta shiga wasan ne da karfin gaske, yayin da ita ko Fulham ta yi ta fuskantar matsaloli a bayan ta.
A sauran wasannin bude gasar da aka fafata a yau Assabar, zakarun gasar ta Premier wato Liverpool, ta soma fafutukar kare kambinta ne da yin galaba akan daya daga cikin sabon shiga, wato Leeds United da ci 4-3, Crystal Palace kuma ta doke Southampton da ci 1-0, yayin da West Ham ta sha kashi a hannun Newcastle da ci 2-0.
Facebook Forum