Wasu rahotanni na bayyana cewa, nan gaba tsohon dan wasan kungiyar kwallon kafa ta Arsenal Patrick Vierra, zai iya zama kocin kungiyar ta Arsenal.

Tsohon mai horas da kungiyar ta Arsenal, Arsene Wenger, ya bayyana ra'ayinsa, da cewar yanzu kungiyar tana bukatar mai horaswa wanda ya san salon yadda kungiyar take wasanta tun a baya.

Tun bayan da ya ajiye takalman wasa a Arsenal, Patrick Viera, ya zama mai horas da tawagar 'yan kwallon kafa bangaren matasa a kungiyar Manchester City, kafin daga bisani ya koma gasar MLS, na kasar Amurka inda ya jaragamar kulob din New York City.

Daga New York ne kuma ya koma kungiyar Nice masu buga gasar Lig 1, a kasar Faransa inda nan ma ya cigaba da aikin horas da 'yan wasanta.

A kwanakin bayane ake alakanta tsohon dan wasan na Arsenal da zama kocin tawagar 'yan wasan kasar Faransa.

Wenger ya kara da cewar yana ganin kamar nan gaba tsohon dan wasan zai iya jagorantar kungiyar Arsenal, saboda kwarewarsa da kuma sanin salon gasar firimiyar Ingila da kuma na wasu kasashe da yayi aiki dasu.

Tsohon kocin yaci gaba da cewa yana ganin zaifi kyau ace Patrick ya cigaba da horas da kungiya ne ba tawagar kasa ba, mu samman yadda yake da karancin shekaru, domin yana da bukatar ya kara nuna kansa ga duniya kafin ya karbi aiki da wata kasa.