Washington D.C. —
Najeriya ta gyara zamanta a saman teburin wasannin shiga gasar cin kofin nahiyar Afirka ta AFCON a rukunin A.
‘Yan wasan Super Eagles sun doke Sao Tome da ci 10-0 a wasan da suka kara a ranar Litinin a wasansu na biyu.
Yanzu suna da maki 6 a rukunin wanda ke dauke da Guinea Bissau, Sao Tome da Saliyo.
A wasanta na farko, Najeriya ta doke Saliyon da ci 2-1 a Abuja a makon da ya gabata.
Rabon da Najeriya ta samu irin wannan garabasar kwallaye tun a shekarar 1959 inda lallasa kasar Benin, a lokacin tana Dahomey, inda aka tashi da ci 10-1.
A badi ne kasar Ivory Coast za ta karbi bakuncin gasar a tsakanin 23 ga watan Yuni zuwa 23 na watan Yuli.
Guinea Bissau ce ke biye da Najeriyar a rukunin na A da maki 4.
